Shabelle News
Muqdisho:
(Sh. M. Network) Madaxweynaha dowladda Soomaaliya oo maanta mar kale
hadlay ayaa waxa uu ku adkeestay mowqifkii uu kaga soo horjeestay in
dowladda Kenya ay ciidamadeeda soo galaan gudaha dalka Soomaaliya.
Wararka
Shabelle ay ka heleyso aqalka Madaxtooyada Fila Soomaaliya ee magaalada
Muqdisho ayaa waxa ay sheegayaan in kadib kulan ay halkaasi ku yeesheen
Madaxweynaha, Ra’iisul wasaaraha iyo xubno ka tirsan golaha wasiirada,
Madaxweynaha uu ku adkeystay mowqifkii uu kaga soo horjeestay soo
galitaanka ciidamada Kenya ee gudaha Soomaaliya.
Wasiirka
gaashaandhiga Soomaaliya Xuseen Carab Ciise oo kulankaasi goob joog ka
ahaa ayaa waxa uu halkaasi ka aqriyay hashiiskii ay gaareen dowladda KMG
iyo mida Kenya markii ay wasiiro ka socday ay soo gaareen magaalada
Muqdisho, waxaana wasiirka uu sheegay in Kenya ay ku heshiiyeen inay
kaliya ay ka taageerto la dagaalanka Al Shabaab iyo tababarida ciidamada
dowladda Soomaaliya.
Madaxweynaha
Soomaaliya oo hadalkiisa ay kasoo horjeesteen wadamada Caalamka ayaa
waxa uu mar kale ku celiyay in si cad ay uga soo horjeedaan dowladda iyo
shacabka Soomaaliyeed inay ciidamada Kenya soo galaan gudaha dalka Soomaaliya.
Ra’iisul
wasaaraha Soomaaliya C/wali Max’ed Cali oo Saxaafadda ay weydiisay waxa
ka jira in isaga iyo Madaxweynaha ay isku qilaafsan yihiin go’aankaani
ayaa waxa uu sheegay in arintaasi ay tahay waxba kama jiraan islamarkaana ay tahay mid ay Saxaafadda buun buunisay.
Hadalka
Madaxweynaha uu mar kale ku sheegay inay kasoo horjeedaan soo
galitaanka ciidamada Kenya ee Soomaaliya ayaa waxa uu imaanayaa wax yar
kadib markii wadamada reer galbeedka gaar ahaa Maraykanka iyo Midowga
Yurub ay wax laga xumaado ku tilmaameen hadalka Madaxweyne Shariif ayna
ku teegeereen dowladda Kenya inay gasho Soomaaliya.
No comments:
Post a Comment